उत्तर अमेरीका कार्यक्रम समिती तर्फे आपल्या सर्वांचे अधिवेशनाच्या संकेत स्थळावर मनःपूर्वक स्वागत! अधिवेशनात उत्तर अमेरिकेतल्या कलाकारांनी सादर केलेले उत्कृष्ट कार्यक्रम आपल्यापर्यंत आणण्याची जबाबदारी आमच्या समितीची आहे. त्याचप्रमाणे अधिवेशनाच्या शुभारंभ आणि समारोपाच्या सोहळ्यातील कार्यक्रमांची जबाबदारीही आमच्याच समितीची आहे.

अधिवेशनात जास्तीत जास्त कार्यक्रम उत्तर अमेरिकेतील कलाकारांचे असावेत असा आपणा सर्व रसिकांचा बऱ्याच वर्षांपासूनचा आग्रह आहे. आपल्या ह्या मताची दखल घेऊन कार्यक्रमांची निवड करण्याची आयोजकांची इच्छा आहे. कार्यक्रमांची संख्या मर्यादित ठेऊन त्यांचा दर्जा वाढविण्याबाबत आमचा कटाक्ष राहील. विविध मनोरंजनात्मक कार्यक्रमांसोबत काही माहितीपूर्ण, वैचारिक, अभ्यासपूर्ण कार्यक्रमांचाही समावेश करण्याचा आमचा मानस आहे. तसेच सर्व वयोगटातील प्रेक्षकांना आवडतील असे कार्यक्रम निवडण्याचा आमचा कसोशीचा प्रयत्न आहे. काही रसिकांनी आणि हितचिंतकांनी आमच्याशी संपर्क साधून आम्हाला उपयुक्त सूचना केल्या आहेत. आपल्याही मनात काही विचार, सूचना, कार्यक्रम अथवा कार्यक्रमांची संकल्पना असल्यास आम्हाला जरूर कळवा. त्यांची योग्य ती दखल आम्ही घेऊ.

कार्यक्रम सादर करण्याविषयीची माहिती या संकेत स्थळावर इतरत्र उपलब्ध आहे ती इच्छुकांनी अवश्य पाहावी.

बरंय तर मंडळी, आता भेटूया जुलै २१-२४, २०११ दरम्यान बृहन्महाराष्ट्र मंडळाच्या पंधराव्या अधिवेशनात, शिकागोला!